2Ki 13 | NdeIBE | STEP | Ngomnyaka wamatshumi amabili lantathu wokubusa kukaJowashi indodana ka-Ahaziya inkosi yakoJuda, uJehowahazi indodana kaJehu waba yinkosi yako-Israyeli eSamariya njalo wabusa okweminyaka elitshumi lesikhombisa.

2 Kings 13

UJehowahazi iNkosi Yako-Israyeli

1 Ngomnyaka wamatshumi amabili lantathu wokubusa kukaJowashi indodana ka-Ahaziya inkosi yakoJuda, uJehowahazi indodana kaJehu waba yinkosi yako-Israyeli eSamariya njalo wabusa okweminyaka elitshumi lesikhombisa. 2 Wenza okubi phambi kukaJehova ngokulandela izono zikaJerobhowami indodana kaNebathi, owayebangele u-Israyeli ukuthi azenze, njalo kazange axekelane lazo. 3 Ngakho ulaka lukaJehova lwavutha ku-Israyeli, okwaze kwathi okwesikhathi eside wabayekela bengaphansi kombuso kaHazayeli inkosi yase-Aramu loBheni-Hadadi indodana yakhe.

4 UJehowahazi wacela ukuthethelelwa kuJehova. UJehova wamuzwa, ngoba wabona ukuba abako-Israyeli bacindezelwe kanganani yinkosi yase-Aramu. 5 UJehova wabapha umkhululi abako-Israyeli owabakhulula esandleni sama-Aramu. Ngalokho abako-Israyeli bahlala emizini yabo njengakuqala. 6 Kodwa abatshiyananga lezono zabendlu kaJerobhowami, lezo ayebangele abako-Israyeli ukuthi bazenze; baqhubeka ngazo, njalo lezinsika zika-Ashera zahlala zilokhu zikhona eSamariya.

7 Akusalanga lutho lwamabutho kaJehowahazi ngaphandle kwabagadi bamabhiza abangamatshumi amahlanu, lezinqola zempi ezilitshumi kanye lezinkulungwane ezilitshumi zamabutho ahamba ngezinyawo, ngoba inkosi yase-Aramu yayibhubhise bonke abanye yabenza baba njengothuli ngesikhathi sokubhula.

8 Mayelana lezinye izehlakalo zombuso kaJehowahazi, lakho konke akwenzayo lokuphumelela kwakhe, akulotshwanga encwadini yembali yamakhosi abako-Israyeli na? 9 UJehowahazi waphumula laboyisemkhulu njalo wangcwatshwa eSamariya. Indodana yakhe uJehowashi yabusa esikhundleni sakhe.

UJehowashi iNkosi Yako-Israyeli

10 Ngomnyaka wamatshumi amathathu lesikhombisa ka-Jowashi inkosi yakoJuda, uJehowashi indodana kaJehowahazi waba yinkosi yako-Israyeli eSamariya, yena-ke wabusa okweminyaka elitshumi lesithupha.

11 Wenza okubi phambi kukaJehova njalo kazange axekelane lezono zikaJerobhowami indodana kaNebathi, ayebangele u-Israyeli ukuthi azenze, waqhubeka ngazo.

12 Mayelana lezinye izahlakalo zombuso kaJehowahazi lakho konke akwenzayo lokuphumelela kwakhe lezimpi azilwa lo-Amaziya inkosi yamaJuda akulotshwanga encwadini yembali yamakhosi ako-Israyeli na?

13 UJehowashi waphumula laboyisemkhulu, ubukhosi bakhe bathathwa nguJerobhowami. UJehowashi wangcwatshwa eSamariya ndawonye lamakhosi abako-Israyeli.

14 U-Elisha wayegula umkhuhlane owacina usumbulala. UJehowashi inkosi yako-Israyeli wahamba ukuyambona wafika wakhala wathi, “Baba! Baba! Izinqola zokulwa labagadi bamabhiza ako-Israyeli!”

15 U-Elisha wathi, “Thatha idandili lemitshoko.” Wakwenza lokho.

16 Wathi enkosini yako-Israyeli, “Phatha idandili lelo ngezandla.” Yathi isiliphethe, u-Elisha wabeka izandla zakhe phezu kwezandla zenkosi.

17 U-Elisha wasesithi, “Vula iwindi elisempumalanga.” Yalivula, u-Elisha wathi, “Tshoka!” Yatshoka. U-Elisha wasememeza eqonqosela wathi, “Umtshoko wokunqoba kaJehova, umtshoko wokunqoba ele-Aramu! Uzabhubhisa ama-Aramu e-Afeki.”

18 Wasesithi enkosini, “Thatha imitshoko yakho,” inkosi yayithatha. U-Elisha wasesithi kuyo, “Tshaya iphansi leli,” inkosi yatshaya iphansi kwaze kwaba kathathu yasisima.

19 Umuntu kaNkulunkulu kwamzondisa lokho wasesithi kuyo inkosi, “Bekufanele ukuthi utshaye iphansi kahlanu loba kasithupha; ngalokho kade uzabe unqobe ele-Aramu njalo walibhubhisa. Kodwa khathesi usuzalinqoba kathathu kuphela.”

20 U-Elisha wafa wangcwatshwa. Abahlaseli bamaMowabi babejayele ukungena elizweni entwasa. 21 Kwathi kwesinye isikhathi abako-Israyeli bengcwaba indoda ethile, babona nampa abahlaseli; basebelahlela isidumbu leso ethuneni lika-Elisha. Kuthe isidumbu leso sithinta amathambo ka-Elisha, indoda leyo yavuka yasukuma yama ngezinyawo zayo.

22 UHazayeli inkosi yase-Aramu wacindezela abako-Israyeli kuso sonke isikhathi sokubusa kukaJehowahazi. 23 Kodwa uJehova waba lomusa kubo waba lozwelo watshengisela ukubakhathalela ngenxa yesivumelwano sakhe lo-Abhrahama, u-Isaka loJakhobe. Kuze kube lamuhla kathandi ukubabhubhisa loba ukubalahla basuke phambi kwakhe.

24 UHazayeli inkosi yama-Aramu wafa, uBheni-Hadadi indodana yakhe wabusa esikhundleni sakhe. 25 Ngakho uJehowashi indodana kaJehowahazi wabuya wathumba njalo amadolobho embusweni kaBheni-Hadadi indodana kaHazayeli ayethunjwe empini kayise uJehowahazi. UJehowashi wamnqoba kathathu, ngakho wawabuyisa amadolobho abako-Israyeli.